🌀🌀🌀 Йöзкост лунпас / Народный календарь 🌀🌀🌀
✅ Январ 19 – öд лун - Ва вежöдан лун (Крешенньö)
Ва вежöдан лун – крам праздник Висерын.
Эжва йылын шуöны «Ва вежöдöм», Луздорын – «светтьö öстанöк».
Тайö лунас юяс вылö вöчöны йöрдан либö öшмöс. Йöрдансö кералöны нёль пома крест моз. Лун шöр кадö сэтчö локтö поп. Сiйö вежöдö васö молитваясöн, Енъясöн да крестöн, кодöс сэсся дзумгылö ваас. Та бöрын ваыс лыддьысьö вежаöн, бурдöдан вынъяса.
Чайтöны, мый тайö лунас колö вöтлыны лёк вынъяссö, кодъяс Вежадыр чöж восьсöн шöйтiсны сикт кузя. Вежöдöм ваöн мыськалöны ки да чужöм, медым мынтöдчыны «сöтанаысьыс» да пежсьыс, купайтчöны.
Васö босьтöны дозмукъясö да видзöны во чöж. Вежа ваöн койöны керка-карта пельöсъяс, гöбöч да öшмöс, мыськалöны енъяс, сэсся пернапасалöны.
Сiдз жö эскöны, мый вой шöр каднас ваыс быдлаын вежа – сiйöс позьö гумовтны öшмöсысь либö ключысь. Унаöн вежа васö босьтöны вичкоысь.
Ношульын шуöны, мый вежа ва койöмöн позьö вöтлыны тöрöканöс, лудiкöс да шыр чукöрöс.
Пожöг сиктын пöжалöны «ва вежöдан ляпушка», кодöс видзöны жытникас Ва вежöдан лунöдз.
Эскöны, мый Ва вежöдан лунас оз позь ёртчыны – Енмыс мыждас таысь.
❄ Приметаяс:
Ывлаас кö кöдзыд – Прокопей лунö поводдяыс лоö бур, лоö бур урожай.
Кодзула енэж кö, гöрд вотöса во водзын.
Рöштвосянь Ва вежöдан лунöдз кö кöдзыд, Петыр лунсянь Прокопейöдз зэра поводдя лоö.
Коми календар, 2009
#ОЦНК #ОЦНК_УХТА #республикакоми #ухта #центркомикультуры
